Takornariartitsinermik inuussuutissarsiuteqarnermi aallarnisaasartunut aningaasalersuinikkut tapersiisarneq pillugu Namminersornerullutik Oqartussat nalunaarutaat nr. 4, 25. januar 2001-imeersoq.
Takornariartitsinermik inuussutissarsiuteqarnermut aningaasalersuinikkut tapersiisarneq pillugu Inatsisartut inatsisaat nr. 15, 31. oktober 1996-imeersoq Inatsisartut inatsisaatigut nr. 12-ikkut 11. november 2000-imi allanngortinneqartumi § 10, imm. 2, § 13, imm. 2 aamma § 14-imi, imm. 4 naapertorlugit makku aalajangersarneqarput:
Atuuffia
§ 1. Aallarnisaasartunut aningaasalersuinikkut tapersiisarneq ukiumoortumik aningaasanut inatsimmi aningaasaliinikkut pisassaaq.
Aallarnisaanermi suliniutinut immikkut piumasaqaatit
§ 2. Tapersiissutinik qinnuteqaat qinnuteqaateqarnermi immersugassaq atorlugu ataatsimiititaliap allattoqarfianut uunga tunniussisoqassaaq: "Takornariaqarnermi Aallarnisaasunut Tapersiisarfik", c/o Kalaallit Nunaanni Takornariaqarnikkut Siunnersuisoqatigiit, Postboks 1552, 3900 Nuuk.
Imm. 2. Qinnuteqaateqarnermi immersugassaq allattoqarfimmut saaffiginnilluni pissarsiariniarneqarsinnaavoq. Qinnuteqarnissamut killiliussaq tusagassiuutitigut nalunaarutigineqassaaq.
Imm. 3. Qinnuteqaat ineriartortitsinissamut pilersaarummik imaqassaaq, tassunga ilanngullugit paasissutissat tapiissuteqariaaseq sorleq kissaatigineqarnersoq ilaatillugu.
Imm. 4. Ingerlatanut ukiut pingasut sinnerlugit ingerlanneqareersunut tunngatillugu ingerlatsinermi naatsorsuutit saqqummiunneqarsimasut kingulliit kiisalu ingerlataq pillugu ukiunut tullernut marlunnut missingersuutit qinnuteqaateqartup qinnuteqaammut paasissutissat ilanngullugit.
Imm. 5. Ingerlatanut ukiut pingasut inorlugit ingerlanneqareersunut tunngatillugu, ingerlatsinermi naatsorsuutit akuerineqarlutik saqqummiunneqartut kingullit, qunnuteqartup akileraartarnermut pisortanut nammineerluni nalunaarutaa kingulleq kiisalu ingerlataq pillugu ukiunut tullernut marlunnut missingersuutit qinnuteqaateqartup qinnuteqaammut ilanngullugit nassiutissavai. Taamaattorli ingerlatanut nutaanut tunngatillugu ingerlatsinermut naatsorsuutit akuerisat kingulliit nassiunneqassanngillat.
Imm. 6. Missingersuutinut imm. 2-mi aamma imm. 3-mi taaneqartunut atatillugu uppernarsarneqassaaq ingerlatap ilaa aningaasalersuinikkut tapersiissutit uku atorlugit matuneqarsinnaan-ngitsut qinnuteqaateqartup aningaasalersorsinnaagai, qinnuteqaateqartorluunniit aningaasalersuutissanik pissarsisinnaasoq.
Qinnuteqaateqartumut immikkut piumasaqaatit
§ 3. Suliffeqarfiit suulluunniit kiisalu peqatigiiffiit tapiiffigineqarsinnaapput.
§ 4. Inatsimmi piumasaqaatitut taaneqartut saniatigut aningaasalersuinikkut tapersiissuteqarfigineqarsinnaassagaanni piumasaqaatit makku naammassineqarsimassapput:
1) Oqartussat akuersissutaat pinngitsooratik pigisariaqartut atorfissaqartinneqartullu pigigini qinnuteqaateqartup qinnuteqaammini uppernarsassavai.
2) Qinnuteqartup pisariaqartumik ingerlatsinermut siulersuinikkullu ingerlanniakkamut kissaatigineqartumut piginnaasaqarnini uppernarsarsinnaasariaqarpai.
3) Pigisat aningaasanik nalillit akisussaaffilerneqarnerat qinnuteqaateqartup uppernarsassavai.
Aningaasalersuinikkut tapersiissuutit ilusaat atugassarititallu
§ 5. Aningaasartuutit akilikkat ataasiakkaat piffissamiluunniit aalajangersimasumi naatsorsuusiat nassiunneqartut aallaavigalugit tapiissutit siumoortumik tunniunneqartassapput. Tapiissutit aatsaat tunniunneqassapput akiligassap allagartaanik imaluunniit assingusumik pigisap pigilerneranut uppernarsaammik takutitsinikkut.
§ 6. Taarsigassarsiat suliffeqarfinnit aningaasalersuisartunit pisortanit nakkutigineqartunit taarsigassarsiarineqartut kisimik qularnaveeqqusiivigineqarsinnaapput. Amerlanerpaamik taarsigassarsiat 50%-ii qularnaveeqquserneqarsinnaapput. Taarsigassarsiat niuernermut tunngassuteqartuni piumasaqaataasut naapertorlugit taarsigassarsiaassapput. Tassunga tunngatillugu aningaasanik atoriaannarnik taarsigassarsiat taarsigassarsianut ikilisikkiartorneqartunut assigiissinneqarput.
Imm. 2. Qularnaveeqqusiisoqartillugu qaqugukkulluunniit akiitsut sinneruttut sanilliunneqarnerisa taamaaqataat taarsigassarseqqaarnermi qularnaveeqqusiissutit amerlassusaat Nunatta karsiata akisussaaffigissavai.§ 7. Aningaasalersuinikkut tapersiissutinik tunineqarnissami piumasaqaataavoq tapersiissutinik tunineqartoq ingerlatsinermi atortut tapersiissutit atorlugit pisiap imaluunniit aningaasaliiffigineqartut aserornissaannut tillinneqarnissaannulluunniit sillimmasiissasoq.
Imm. 2. Allatigut ingerlatamut attuumassuteqartunik sillimmasiisoqarnissaa ataatsimiititaliap piumasaqatigisinnaavaa.
Taarsigassarsiareriikkanik allanngortitserineq
§ 8. Ataatsimiititaliap allattoqarfiata tapersiissutitut taarsigassarsiareriikkat, qularnaveeqqusiissutit taakkualuunniit arlaasa allanngortiternissaat peqataaffigisinnaavaa. Allanngortiterineq taarsigassarsisup, suliffeqarfiup aningaasaliisarfiup allattoqarfiullu akornanni suleqatigiissutigineqassaaq.
Imm. 2. Tapiissutinut siornatigut inatsisit naapertorlugit taarsigassarsiatut tunniunneqarsimasunut illuutinut aalaakkaasunut ingerlatanilu atortunut annertuunut 4% erniaritinneqassaaq. Ingerlatsinermi atortut annikinnerit ernialerneqassanngillat.
Imm. 3. 4%-inik ernialiineq siornatigut taarsigassarsiarineqartunut tamanut atuuppoq, qanorluunniit 1. januar 2001-imi akiligassanut uppernarsaammi ernialiussassaq allassimagaluarpat.
Nalunaarusiornissamut piumasaqaatit
§ 9. Naammassinninnissamut isumaqatigiissutip kingorna qaammatit pingasut qaangiutsinnagit ingerlatamut naatsorsuutinik ingerlatamullu nalunaarusiamik allattoqarfik nassinneqassaaq. Allattoqarfik piffissamik sivikilliliinissamut aalajangiisinnaatitaavoq.
Imm. 2. § 2, imm. 3 naapertorlugu ineriartortitsinissamut pilersaarutigineqaqqaartup allannguuteqangaatsiarneranik pisoqarpat allattoqarfimmut tamanna nalunaarutigineqassaaq, tassunga ilanngullugu ingerlataq naammassineqarsinnaanngitsutut nalilerneqarpat. Nalunaaruteqartoqanngippat tamassuma tapiissutinik sinneruttunik atorunnaarsitsineq kingunerisinnaavaa.
Tapersiissutitut akuerineqareersut unitsinneqarsinnaanerat
§ 10. Tapersiissutinik tunniussisarneq ataatsimiititaliap unitsissinnaavaa:
1) naliliilluni isumaqaruni ingerlataq ingerlateqqinneqarsinnaanngitsoq,
2) naliliippat tapersiissutinik tunineqartoq paasissutissanik eqqunngitsunik imaluunniit paasinerluutaasinnaasunik tunniussisimasoq,
3) naliliippat tapersiissutinik tunineqartoq paasissutissanik tapersiissutinik tunniussinermut pingaaruteqartunik nipangiussisimasoq, imaluunniit
4) naliliippat tapersiissutinik tunineqartup piumasaqaatit ataatsimiititaliamit aalajangersarneqartut imaluunniit piffissaliussat pillugit nalunaarut manna tunngavigalugu kiisalu takornariartitsinermik inuussutissarsiuteqarnermut aningaasalersuinikkut tapersiisarneq pillugu Inatsisartut inatsisaanni kingornatigullu allanngortinneqartumi kapitali 3 naapertorlugu isumaqatigiissutigineqartut eqqortinngikkai.
Imm. 2. Neriorsuummut piumasarisaasut allattoqarfiup piffissaliussatut aalajangiussaata iluani neriorsuutip tunniunneqarnerata kingorna sivisunerpaamik ukioq ataaseq piffissaliussaq eqqortinneqanngippat ataatsimiititaliap tapersiinissamut qularnaveeqqusiinissamulluunniit neriorsuutit unitsissinnaavai.
Atortuulersinneqarnera il.il.
§ 11. Nalunaarut manna 15. februar 2001-imi atuutilerpoq. Peqatigitillugu takornariartitsinermik inuussuutissarsiuteqarnermi aallarnisaasartunut aningaasalersuinikkut tapersiisarneq pillugu Namminersornerullutik Oqartussat nalunaarutaat nr. 9, 31. marts 2000-imeersoq atorunnaarpoq.
Namminersornerullutik Oqartussat, ulloq 25. januar 2001.
Simon Olsen/
Jørn Birk Olsen